2017-يىل 12-ئاينىڭ 20-كۈنى، جۇڭگو ئىسلام جەمئىيىتى ئۇيۇشتۇرغان «جۇڭگو مۇسۇلمانلىرى» ژۇرنىلى نەشر قىلىنغانلىقىنىڭ 60 يىللىقى سۆھبەت يىغىنى بېيجىڭ خەلق سارىيىدا داغدۇغىلىق ئۆتكۈزۈلدى.

دۆلەتلىك دىن ئىشلىرى ئىدارىسىنىڭ مۇئاۋىن باشلىقى جاڭ يەنتۇڭ دۆلەتلىك دىن ئىشلىرى ئىدارىسىغا ۋاكالىتەن سۆز قىلدى، جۇڭگو ئىسلام جەمئىيىتىنىڭ رەئىسى ياڭ فامىڭ ئاخۇن تەبرىك سۆزى سۆزلىدى. دۆلەتلىك دىن ئىشلىرى ئىدارىسى 3-مەھكىمىسىنىڭ كۆزەتكۈچىسى زو ۋېيگو، مەركىزىي كومىتېت بىرلىك سەپ بۆلۈمى 2-ئىدارىسىنىڭ مۇئاۋىن كۆزەتكۈچىسى چۇ يوچى، جۇڭگو كاتولىك دىنى جەمئىيىتىنىڭ رەئىسى ئېپىسكوپ ما يىڭلىن، جۇڭگو داۋجياۋ دىنى جەمئىيىتىنىڭ مۇئاۋىن رەئىسى خۇاڭ شىنياڭ قاتارلىقلار يىغىنغا ئىشتىراك قىلدى ۋە يىغىننى تەبرىكلىدى. جۇڭگو ئىسلام جەمئىيىتىنىڭ باش كاتىپى ما جۇڭپىڭ يىغىنغا رىياسەتچىلىك قىلدى.

جاڭ يەنتۇڭ مۇنداق دېدى: ”60 يىلدىن بۇيان «جۇڭگو مۇسۇلمانلىرى» ژۇرنىلى جۇڭگودىكى ھەر مىللەت مۇسۇلمانلىرىنىڭ ۋەتەن بىلەن بولغان تەقدىرداشلىق ۋە ھەمدەملىك ھېسسىياتىنى ئەكس ئەتتۈردى، يېڭى جۇڭگو مۇسۇلمانلىرىنىڭ ئىتتىپاقلىق ۋە تەرەققىيات ئىزلىرىنى جۇلالاندۇردى ۋە ئۇلارنىڭ ئېسىل ئوبرازىنى دۇنياغا نامايان قىلدى؛ جۇڭگودىكى ئىسلام دىنىنىڭ ئۇلۇغۋار روھىنى ئىپادىلەپ، مۇسۇلمانلارغا ئۆزىنىڭ مۇنبىرى ۋە مەنىۋى باغچىسىنى ھازىرلاپ بەردى؛ ۋەتەن مەدەنىيىتىنىڭ بۈيۈك مېلودىيەسىدە ئىسلام ئىلمى ۋە مەدەنىيىتىنىڭ يېڭى مۇزىكىسىنى ياڭراتتى. «جۇڭگو مۇسۇلمانلىرى» ژۇرنىلى ئارقىلىق بىز ئىسلام دىنى ساھەسى ۋە مۇسۇلمانلار ئاممىسىنىڭ مىللەتلەر ئىتتىپاقلىقى، دىنلار ئىناقلىقى، ۋەتەننىڭ بىرلىكى ۋە جەمئىيەت مۇقىملىقىنى ھەسسىلەپ قەدىرلىگەنلىكى ۋە ئۇنى ئىزچىل قوغداپ كەلگەنلىكىنى كۆردۇق؛ ئىسلام دىنىدىكى تىنچلىق، ئوتتۇرھاللىق، كەڭ قورساقلىق، ئىلىمسۆيەرلىك، ياخشىلىققا ئۈندەپ يامانلىقنى توسۇش، ئىككى ئالەملىك بەختكە ئىنتىلىش قاتارلىق ماھىيەتلىك مەزمۇنلارنى چۈشەندۇق؛ مۇسۇلمانلار ئاممىسىنىڭ جۇڭگو ئىسلام مەدەنىيىتىدىن نەقەدەر پەخىرلىنىدىغانلىقى ۋە ئۇنى قەدىرلەيدىغانلىقىنى بىلدۇق؛ ئاخۇن، ئۆلىمالارنىڭ ئىسلام دىنى دەستۇرلىرىنى دەۋر ۋە جەمئىيەت تەرەققىياتىنىڭ تەلىپىگە ئۇيغۇن شەرھلەپ ھەم تەبلىغ قىلىپ كېلىۋاتقانلىقىنى، پارتىيەنىڭ مىللەتلەر-دىن سىياسىتىنىڭ پارلاق نۇرى ئاستىدا ھەر ساھە، ھەر كەسىپتىكى مۇسۇلمانلارنىڭ يېڭى قىياپەت بىلەن ئوتتۇرىغا چىقىۋاتقانلىقىنى، شۇنداقلا بارلىق مۇسۇلمان ئاممىنىڭ جەمئىيەت ئىناقلىقى، دىنلار ئىناقلىقى، مىللەتلەر ئىناقلىقى ۋە دۇنيا تىنچلىقىنى ھەر ۋاقىت، ھەر زامان ئارزۇ قىلىدىغانلىقىنى كۆردۇق. ئۇ يەنە «جۇڭگو مۇسۇلمانلىرى» ژۇرنىلىدىن كۈتىدىغان تۆۋەندىكى تۆت تۈرلۈك ئۈمىدىنى ئوتتۇرىغا قويدى: بىرىنچى، «جۇڭگو مۇسۇلمانلىرى» ژۇرنىلى ئومۇمىي ۋەزىيەتنى چۆرىدەپ، مەركەزنىڭ سىياسىتى ئۈچۈن خىزمەت قىلىشى، ئىلمىي تەتقىقات ژۇرنىلى بولۇپلا قالماي، مۇسۇلمان ئامما قىزىقىدىغان ئۇچۇرلارنى يەتكۈزىدىغان ئاممىباب ئوقۇشلۇق بولۇشى كېرەك؛ ئىككىنچى، «جۇڭگو مۇسۇلمانلىرى» ژۇرنىلى دەۋر روھى ۋە ۋەتەنپەرۋەرلىك ھېسسىياتى بىلەن مۇسۇلمان ئاممىنىڭ قەلبىنى يورۇتۇپ، ئۇلارنى دۆلىتىمىز ئىسلام دىنىنى جۇڭگوچىلىشىش يۆنىلىشىدە چىڭ تۇرۇشقا، ئىسلام دىنىنى سوتسىيالىستىك جەمئىيەتكە ئۇيغۇنلاشتۇرۇشقا يېتەكلىشى لازىم؛ ئۈچىنچى، «جۇڭگو مۇسۇلمانلىرى» ژۇرنىلى پارتىيە بىلەن مۇسۇلمان ئامما ئوتتۇرىسىدىكى چۈشىنىش ۋە ئالاقىنى كۈچەيتىشى، جۇڭگو مۇسۇلمانلىرى بىلەن دۇنيا مۇسۇلمانلىرى ئوتتۇرىسىدىكى ئۆزئارا تونۇشۇش ۋە چۈشىنىشنى ئىلگىرى سۈرۈشى، شۇنداقلا مۇسۇلمانلار بىلەن مۇسۇلمان ئەمەسلەر ئوتتۇرىسىدىكى ئۆزئارا چۈشىنىش ۋە دوستلۇقنى كۈچەيتىشتە تېخىمۇ زور رول ئوينىشى لازىم؛ تۆتىنچى، «جۇڭگو مۇسۇلمانلىرى» ژۇرنىلى جۇڭگو مۇسۇلمانلىرىنىڭ يېڭى دەۋردىكى يېڭى تۆھپىلىرى، يېڭى ئوبرازى ۋە يېڭى سالاپىتىنى ئۈزلۈكسىز نامايان قىلىشى لازىم“.

رەئىس ياڭ فامىڭ ئاخۇن تەبرىك سۆزىدە مۇنداق دېدى: ”60 يىلدىن بۇيان، «جۇڭگو مۇسۇلمانلىرى» ژۇرنىلى توغرا ئىدىيە يۆنىلىشىدە باشتىن-ئاخىر چىڭ تۇرۇپ، پارتىيەنىڭ دىنىي ئېتىقاد ئەركىنلىكى سىياسىتى ۋە ئىسلام دىنىنىڭ ئېسىل ئەنئەنىسىنى تەشۋىق قىلدى؛ ئىسلام ئىلمى ۋە مەدەنىيىتى مۇنبىرى قۇرۇپ، ھەر مىللەت جۇڭگو مۇسۇلمانلىرىنىڭ ۋەتەننى سۆيۈش، دىننى سۆيۈش ئىش-ئىزلىرىنى بايان قىلىپ، ئۇلارنى دۆلىتىمىزنىڭ ئىقتىسادىي ئىجتىمائىي تەرەققىياتىغا ئاتلاندۇرۇش ئۈچۈن ياخشى پىكىر مۇھىتى بەرپا قىلدى. 60 يىللىق تەرەققىيات داۋامىدا پارتىيە ۋە دۆلەت رەھبەرلىرى مەزكۇر ژۇرنالنىڭ تەرەققىياتىغا ھەر ۋاقىت كۆڭۈل بۆلۈپ كەلدى؛ بىر تۈركۈم ئاكتىپ ئاپتورلار قوشۇنى كونىلارنىڭ ئىزىنى بېسىپ ژۇرنال ئۈچۈن ماقالە يوللاپ تۇردى“. ئۇ «جۇڭگو مۇسۇلمانلىرى» ژۇرنىلىنىڭ بۇ 60-يىلىنى باشلىنىش نۇقتىسى قىلىپ، ئۆز ئەسلىنى ئۇنۇتماي، تېخىمۇ تىرىشىپ ئالغا بېسىشىنى ئۈمىد قىلىپ مۇنداق دېدى: ”بىرىنچىدىن، ۋەتەننى سۆيۈش، دىننى سۆيۈش پىرىنسىپىدا چىڭ تۇرۇش كېرەك. شى جىنپىڭنىڭ يېڭى دەۋر جۇڭگوچە سوتسىيالىزم ئىدىيەسىنى يېتەكچى قىلىپ، پارتىيەنىڭ سىياسىي يۆنىلىشى ھەمدە دىن خىزمىتىگە ئائىت ئاساسىي يۆنىلىشىنى تەشۋىق قىلىش، ئىسلام دىنىنى جۇڭگوچىلاشتۇرۇش يۆنىلىشىدە چىڭ تۇرۇش، ’بىر بەلباغ، بىر يول‘ قۇرۇلۇشى، جۇڭخۇا مىللەتلىرى ئورتاق گەۋدىسى ۋە ئىنسانىيەت تەقدىرى ئورتاق گەۋدىسى بەرپا قىلىش ۋە ئىسلام دىنىنى سوتسىيالىستىك جەمئىيەتكە تېخىمۇ ئۇيغۇنلاشتۇرۇش ئۈچۈن ياخشى پىكىر مۇھىتى ھازىرلاش لازىم؛ ئىككىنچىدىن، دىندا دىننىڭ گېپىنى قىلىش پىرىنسىپىدا چىڭ تۇرۇش كېرەك. ئىسلام دىنىنىڭ ۋەتەننى سۆيىدىغان، دىننى سۆيىدىغان، تىنچلىقنى تەشەببۇس قىلىدىغان، ئوتتۇرھاللىقتا چىڭ تۇرىدىغان، قانۇنغا رىئايە قىلىدىغان، ئىككى ئالەملىك بەخت-سائادەتكە ئىنتىلىدىغان ئاساسىي ئېقىمىنى چوڭقۇر چۈشەندۈرۈپ ھەم زور كۈچ بىلەن تەشۋىق قىلىپ، ھەر مىللەت مۇسۇلمان ئاممىسىنى توغرا ئېتىقاد، توغرا ئەمەلگە يېتەكلەپ، ئەسەبىيلىككە قارشى تۇرۇشىمىز، جەمئىيەتتىكى باشقا ساھەدىكىلەرنى ئىسلام دىنىغا بولغان خاتا، بىر تەرەپلىمە قارىشىنى تۈگىتىشكە يېتەكلەپ، ئىسلام دىنىنىڭ ئاساسلىق ئەقىدىسى، قىممەت قارىشى ۋە ئىجتىمائىي مەسئۇلىيىتىنى توغرا تونۇيدىغان قىلىشىمىز لازىم؛ ئۈچىنچىدىن، ژۇرنالنىڭ نۇقتىلىق يېتەكلەش ئالاھىدىلىكىدە چىڭ تۇرۇش كېرەك. ھەر مىللەت مۇسۇلمانلىرى ئارىسىدىكى تىپىك ئەھمىيەتكە ئىگە سۆيۈملۈك كىشىلەرنى، ھۆرمەتكە سازاۋەر كىشىلەرنى، ئۇقۇمۇشلۇق كىشىلەرنى ۋە ئۇلارنىڭ ئىش-ئىزلىرىنى قېزىپ چىقىپ، ئۇلارنىڭ ھەقىقىي خاراكتېرى ۋە تەسىرلىك ئىش-ئىزلىرىنى بايان قىلىش ئارقىلىق قەلبلەرگە يورۇقلۇق، جەمئىيەتكە ئىللىقلىق، ئاۋامغا ئىلھام ۋە پاراسەت ئاتا قىلىش لازىم؛ تۆتىنچىدىن، مەزكۇر ژۇرنالنىڭ تاراتقۇ ئىدىيەسىنى مۇستەھكەملەشتە چىڭ تۇرۇش كېرەك. خادىملار سىياسىي ئىدىيە سەۋىيەسىنى ئۈزلۈكسىز ئۆستۈرۈشى، دىنىي بىلىمىنى بېيىتىشى، ئاخباراتچىلىق بىلىملىرىنى پۇختا ئىگىلىشى، يېزىقچىلىق ۋە تەھرىرلەش قابىلىيىتىنى ئۆستۈرۈشى، كەسپىي ئەخلاققا رىئايە قىلىشى، سىياسىي مەيدانى مۇستەھكەم، كەسىپتە پىششىق، ئىستىلى دۇرۇس، ئىنتىزامچان ژۇرنال خادىملىرىدىن بولۇشى لازىم“.

سۆھبەت يىغىنىدا يەنە ئېپىسكوپ ما يىڭلىن مەملىكەتلىك دىنىي جەمئىيەتلەرگە ۋاكالىتەن تەبرىك سۆزى قىلدى، جۇڭگو ئىجتىمائىي پەنلەر ئاكادېمىيەسى دۇنيا دىنلىرى تەتقىقات ئورنىنىڭ تەتقىقاتچىسى فېڭ جىنيۈەن تەتقىقاتچىلار ۋە ئاپتورلارغا ۋاكالىتەن سۆز قىلدى.