ئالىم-ئۆلىمالار قاراڭغۇدا كىشىلەرگە يورۇقلۇق ئاتا قىلىدىغان نۇرلۇق چىراغقا ئوخشاش بولۇپ، چىراغ ئۆزىنىڭ كۆيۈشى بەدىلىگە باشقىلارغا يورۇقلۇق بېغىشلىغاندەك، ئالىم-ئۆلىمالارمۇ بىلىمى ئارقىلىق جامائەتنىڭ قەلبىنى يورۇتىدىغان ۋە ئازغۇنلۇقتا قالغان كىشىلەرگە يول كۆرسىتىپ بېرىدىغان نۇرلۇق چىراغدۇر. رەسۇلۇللاھ بىلىم ئارقىلىق باشقىلارنىڭ قەلبىنى يورۇتىدىغان چىراغ مەسەللىك ئالىم-ئۆلىمالارنى ئىلگىرىكى زاماندىكى ئۈممەتلەرنىڭ پەيغەمبەرلىرى بىلەن ئوخشاش دەرىجىدە يۈكسەك دەپ قارىغان ۋە ئالىم-ئۆلىمالارغا ”پەيغەمبەرلەرنىڭ ۋارىسلىرى“ دېگەن شان-شەرەپنى بېرىپ: ”ئۆلىمالار پەيغەمبەرلەرنىڭ ۋارىسلىرىدۇر“ دەپ ئېلان قىلغانىدى.

بۇ ۋەز-تەبلىغلەر توپلىمى 1-، 2-، 3-، 4-يىڭى ۋەز-تەبلىغلەر كىتابىنىڭ ئومۇمىي توپلىمى بولۇپ، 47 ۋەز-تەبلىغنى ئۆز ئىچىگە ئالىدۇ. “ۋەز”(الوعظ) ئەرەبچە سۆز بولۇپ، “نەسىھەت قىلىش” دېگەن مەنىگە ئىگە، بىز مۇسۇلمانلارنىڭ تىلى بىلەن ئېيتقاندا “كىشىلەرنى ياخشىلىققا ئۈندەپ، يامانلىقتىن توسۇش” دېمەكتۇر. ۋەز سۆزلەش مەملىكىتىمىزدىكى ئىسلام دىنىنىڭ ئەنئەنىسى، ئاخۇن-ئىماملارنىڭ ھېيت-ئايەم، جۈمە كۈنلىرى ۋە ھەرخىل دىنىي پائالىيەت سورۇنلىرىدا مۇسۇلمانلارغا ۋەز-نەسىھەت قىلىدىغان بىر خىل ئەنئەنىۋى تەرغىبات ئۇسۇلى. ئۇنىڭ مەزمۇنى ئىسلام دىنىنىڭ ھەرقايسى تەرەپلىرىنى، مەسىلەن: دىنىي ئەقىدە، شەرىئەت، دىنىي ئەمەل، قائىدە-يوسۇن، ئەدەب-ئەخلاق، تارىخ، مەدەنىيەت، «قۇرئان كەرىم» ۋە «ھەدىس شەرىف» نەسىھەتلىرى، پەيغەمبەر ئەلەيھىسسالام ۋە پېشىۋا ئۇلىمالار قاتارلىقلارنى ئۆز ئىچىگە ئالىدۇ.

ئەسسالامۇئەلەيكۇم قېرىنداشلار! ئىسلام دىنى ئىنسانىيەتنى ھەر قايسى جەھەتتىن ئەتراپلىق تەربىيىلەپ، ھەربىر شەخسنى جەمئىيەتكە ياراملىق قىلىپ يىتۈشتۈرۈپ، ئۇنى جەمئىيەت ئۈچۈن پايدىلىق ئىشلارنى قىلىدىغان، جەمئىيەت تەرتىۋىنى ساقلايدىغان، خەلقلەر دوستلۇقىنى كۈچەيتىدىغان، ئىتتىپاقلىقنى قوللايدىغان، قېرىنداشلىقنى مۇستەھكەملەيدىغان، روھىي پاك، قەلبى پاك، ئەخلاقلىق، ئەدەبلىك بولۇشقا تەرغىب قىلىدىغان مۇقەددەس دىن. بۇ دىننىڭ تەشەببۇس ۋە تەلىماتلىرى بىلەن ماڭغان كىشى دۇنيادا بەختىيار بولۇپ ئاخىرەتتە ئاللاھنىڭ جەننىتى بىلەن مۇكاپاتلىنىدۇ