بۇ يىل جۇڭگو ھەج خىزمىتى باش ئۆمىكى مەدىنە مۇنەۋۋەرە شەھرىنىڭ مەركىزىدىن 22 مېھمانخانا كىرالىغان بولۇپ، ھاجىلارنىڭ دەم ئېلىشىغا، ئىبادەت قىلىشىغا ناھايىتى قولايلىق؛ ھاجىلارغا ئىسسىق ئۆتۈپ كېتىدىغان، ھاجىلار يولدىن ئېزىپ قالىدىغان خەۋپلەرمۇ زور دەرىجىدە ئازايتىلدى. جۇڭگو ھەج خىزمىتى باش ئۆمىكى مەدىنە مۇنەۋۋەرە شەھرىدە ”ئۆلكە بويىچە قاتلاممۇ قاتلام مەسئۇل بولۇش“ تۈزۈمىنى يولغا قويۇپ، ھەر قايسى ئۆلكىلىك ئۆمەكلەرنىڭ ئاكتىپلىقىنى تولۇق جارى قىلدۇرۇپ، ھاجىلارنىڭ دىنىي پائالىيەتلىرىنى كۆڭۈل قويۇپ ئورۇنلاشتۇرۇش بىلەن بىر ۋاقىتتا، سەئۇدى ئەرەبىستانىنىڭ ئېلېكترونلۇق قانال سىستېمىسىنى ئىشقا سېلىش، پاسپورت باشقۇرۇش ئىسلاھاتى قاتارلىقلار ئېلىپ كەلگەن يېڭى قىيىنچىلىقلارنى يەڭدى؛ ھاجىلارنى ئايروپورتتا كۈتىۋېلىش، ياتاققا ئورۇنلاشتۇرۇش، تاماق بىلەن تەمىنلەش، دىنىي يېتەكچىلىك، سەھىيە ۋە كېسەلدىن مۇداپىئەلىنىش، بىخەتەرلىك، زىيارەت، يۈك-تاق توشۇش، ھاجىلارنى ئۇزىتىش قاتارلىق خىزمەتلەرنى ئاكتىپ، تولۇق ئورۇنلىدى.  ”ھەج خىزمىتىنى ياخشى ئورۇنلاشتىكى بىرىنچى ۋەزىپە بىخەتەرلىكتە چىڭ تۇرۇش“ پرىنسىپىنى ئەمەلىيلەشتۈرۈپ، ھاجىلارغا مۇلازىمەت قىلىشتا يېڭىلىق يارىتىپ، ھاجىلارنى كوللېكتىپ غىزالاندۇرۇش ۋە يۈك-تاق بىلەن ئادەمنى ئايرىم توشۇش ئۇسۇلىنى تېخىمۇ ياخشىلىدى؛ قاتناش بىخەتەرلىكى نەق مەيدان تەربىيەسى ئېلىپ بېرىش بىلەن بىرگە، ھەربىر ئاپتوبۇستا بىخەتەرلىك خادىمى بولۇش، ئەڭ يېڭى ئېسىل ئاپتوبۇسلارنى ئىشلىتىش، ھاجىلارنىڭ مەدىنەدىن يولغا چىقىش ۋاقتىنى ئالدىغا سۈرۈش قاتارلىق يېڭى چارىلەرنى يولغا قويۇپ، ھاجىلارنىڭ مەدىنە مۇنەۋۋەرەدىن مەككە مۇكەررەمەگە سالامەت يېتىپ بېرىشىغا كاپالەتلىك قىلدى.