2015-يىل 8-ئاينىڭ 22-كۈنى چۈشتىن بۇرۇن، دۆلىتىمىزنىڭ تۇنجى تۈركۈمدىكى ھاجىلىرى گەنسۇنىڭ لەنجۇ شەھىرىدىن يولغا چىقىپ، سەئۇدى ئەرەبىستانىنىڭ يېڭىدىن ياسالغان مەدىنە خەلقئارا ئايروپورتىغا سالامەت كەلدى ۋە جۇڭگو ھاجىلىرىنىڭ بۇ يىلقى ھەج سەپىرىنىڭ مۇقەددىمىسىنى باشلىدى. شۇ كۈنى يەنە گەنسۇ بىلەن يۈننەندىن ھاجىلارنى ئېلىپ ئىككى ئايروپىلان مەدىنە ئايروپورتىغا كەلدى.

جۇڭگو ئىسلام جەمئىيىتىنىڭ مۇئاۋىن رەئىسى، جۇڭگو ھەج خىزمىتى باش ئۆمىكىنىڭ باشلىقى ئادىل ھاجى كېرىم، دۆلەتلىك دىن ئىشلىرى ئىدارىسى 3- مەھكىمىسىنىڭ باشلىقى، ئۆمەك مەسلىھەتچىسى ماجىن قاتارلىق رەھبەرلەر خىزمەت ئۆمىكىدىكى خادىملارنى باشلاپ، مەدىنە ئايروپورتىغا بېرىپ، تۇنجى تۈركۈمدە كەلگەن ھاجىلارنى قىزغىن كۈتۈۋالدى.

ئادىل ھاجى كېرىمنىڭ ئېيتىشىغا قارىغاندا، بۇ يىلقى ھەج تاۋاپقا كېلىدىغان جۇڭگولۇق ھاجىلار 14مىڭ 500 ئادەم بولۇپ، جۇڭگو خەلقئارا ئاۋىياتسىيەسى، جەنۇبى جۇڭگو ئاۋىياتسىيەسى، شەرقىي جۇڭگو ئاۋىياتسىيەسى قاتارلىق شىركەتلەردىن ھۆددىگە ئېلىنغان 47 ئايروپىلان بىلەن بېيجىڭ، ئۈرۈمچى، لەنجۇ، يىنچۈەن، كۈنمىڭ قاتارلىق شەھەرلەردىن يولغا چىقىپ، مەدىنە ئايروپورتىغا كېلىدۇ. ھاجىلار مەدىنەدە 5 كۈن تۇرۇپ، پەيغەمبەر مەسچىتى قاتارلىق مۇقەددەس ئورۇنلارنى زىيارەت قىلغاندىن كېيىن ئاپتوبۇسقا ئولتۇرۇپ مەككىگە بېرىپ، رەسمىي ھەج پائالىيىتىگە تەييارلىق قىلىدۇ.